ایف آئی اے امیگریشن جناح انٹرنیشنل ایئرپورٹ نے عمرہ زائرین کے روپ میں جانے والے مبینہ 11 بھکاریوں کو روک کر انہیں اینٹی ہیومن ٹریفکنگ سرکل کراچی منتقل کردیا ہے.
تحقیقات میں پتہ چلا کہ تمام مسافروں کے پاس ہوٹل بکنگ اور واپسی کا ٹکٹ جعلی تھا۔
ایف آئی اے امیگریشن حکام نے 11 اور 12 اگست کی درمیانی شب جناح انٹرنیشنل ایئرپورٹ سے پرواز نمبر PF-714 سے جدہ کے لئے جانے والے 11 مسافروں شاہد، کنیز، ظفر، زیدی، مجاہد، عالیہ بتول، پٹھانی، ناہید، منظوراں، لیلا کو آف لوڈ کرکے اینٹی ہیومن ٹریفکنگ سرکل کو منتقل کردیا ہے۔
تمام مسافروں کو مشکوک سفری دستاویزات کی وجہ سے مبینہ طور پر بھکاری سمجھا جانے کی وجہ سے سفر سے روکا گیا ہے۔
امیگریشن حکام کا کہنا ہے کہ تمام مسافروں کے پاس ہوٹل کی بکنگ اور ریٹرن ٹکٹ جعلی تھا۔
ایف آئی اے اینٹی ہیومن ٹریفکنگ سرکل مسافروں سے ہوٹل بکنگ اور واپسی کے جعلی ٹکٹ سے متعلق تحقیقات اور تفتیش کے بعد ہی فیصلہ کیا جائے گا کہ ان کے خلاف کیا کارروائی کرنی ہے ۔
