قانونی آئی ٹی انڈسٹری پر کارروائیاں ؟؟ امریکی و یورپی بینکوں،کمپنیوں کے کروڑوں ڈالر کا کاروبار اور پاکستانی نوجوانوں کا مستقبل خطرے میں؟

کراچی میں امریکی بینکوں اور عالمی کمپنیوں کے لیے سافٹ ویئر تیار کرنے، کریڈٹ کارڈ ایپلی کیشنز بنانے اور حساس مالیاتی ڈیٹا کی دیکھ بھال کرنے والے پاکستانی ادارے کیا اب اپنی کاروباری سرگرمیاں جاری رکھنے میں خوف محسوس کر رہے ہیں؟ کیا سائبر کرائم کے خلاف کارروائیوں کے نام پر قانونی سافٹ ویئر ہاؤسز اور کال سینٹرز بھی زد میں آ رہے ہیں، جبکہ غیر قانونی کال سینٹرز المعروف ’’ڈبہ‘‘ بدستور اپنا نیٹ ورک چلا رہے ہیں؟

کراچی میں قائم چار ایسے سافٹ ویئر ہاؤسز موجود ہیں جو امریکی بینکوں کے لیے کریڈٹ کارڈ ایپلی کیشنز تیار کرنے اور ان کے رئیل ٹائم ڈیٹا کی اپ ڈیٹنگ سمیت سکیورٹی کے معاملات انجام دے رہے ہیں۔ ان میں سے ایک ادارے کے بارے میں دعویٰ ہے کہ اس کا ماہانہ کاروبار تقریباً 25 لاکھ امریکی ڈالر ہے، جو پاکستان کی معیشت میں زرمبادلہ اور آئی ٹی ایکسپورٹس کے ذریعے اہم حصہ ڈال سکتا ہے۔ ایک یہ ہی مثال پاکستان کی آئی ٹی انڈسٹری کو دوام دینے کے لئے کافی یے۔

پاکستان پہلے ہی سائبر کرائم کے بڑھتے ہوئے چیلنجز سے نمٹنے میں مشکلات کا سامنا کر رہا ہے، لیکن سوال یہ ہے کہ نیشنل سائبر کرائم انویسٹی گیشن ایجنسی (این سی سی آئی اے) کی جانب سے سافٹ ویئر ہاؤسز اور کال سینٹرز کے خلاف کارروائیوں کے لیے کیا کوئی واضح، شفاف اور تکنیکی بنیادوں پر قائم نظام تشکیل دیا گیا ہے؟ یا پھر غیر تکنیکی افسران کی جانب سے کیے جانے والے فیصلے پاکستان کی ابھرتی ہوئی آئی ٹی انڈسٹری کے لیے نئی مشکلات پیدا کر رہے ہیں؟

دنیا بھر میں قانونی آؤٹ سورسنگ، بینکنگ سپورٹ سروسز اور غیر قانونی کال سینٹرز کے درمیان فرق محض ظاہری سرگرمیوں سے طے نہیں کیا جا سکتا۔ اس کے لیے کمپنیوں کے معاہدوں، کلائنٹس، ڈیٹا سکیورٹی پروٹوکول، مالیاتی لین دین، کال ریکارڈز، آئی پی ایڈریسز اور متعلقہ ریگولیٹری منظوریوں کی تکنیکی جانچ ضروری ہوتی ہے۔

پاکستان میں بھی یہی فرق واضح کیے بغیر کارروائیوں کا دائرہ وسیع کرنا ایک ایسی صنعت کو نقصان پہنچا سکتا ہے جو نوجوانوں کے لیے روزگار اور ملک کے لیے قیمتی زرمبادلہ کا ذریعہ بن رہی ہے۔

کیا آپ کو معلوم ہے کہ کراچی کی ایک مرکزی شاہراہ پر تعمیر ہونے والی ایک عمارت کے بارے میں دعویٰ کیا جاتا ہے کہ اسے امریکی کمپنی کی مخصوص ضروریات کے مطابق تیار کیا گیا، تاکہ وہاں کام کرنے والے ایک ہزار سے زائد ایجنٹس امریکی کمپنی کا ڈیٹا محفوظ رکھتے ہوئے اس کی کاروباری سرگرمیوں کو جاری رکھ سکیں؟

اگر امریکی بینکوں اور کمپنیوں نے پاکستانی نوجوانوں کی پیشہ ورانہ صلاحیتوں پر اعتماد کرتے ہوئے یہاں سرمایہ کاری کی، اپنے حساس ڈیٹا تک رسائی دی اور طویل المدتی کاروباری معاہدے کیے تو پھر سوال یہ ہے کہ پاکستان میں کون سی انتظامی اور ریگولیٹری رکاوٹیں اس اعتماد کو کمزور کر رہی ہیں؟

گزشتہ دس برس میں میٹرک، انٹرمیڈیٹ اور گریجویشن کی تعلیم حاصل کرنے والے متعدد پاکستانی نوجوان اپنی پیشہ ورانہ صلاحیتوں کے بل پر امریکی اور یورپی کمپنیوں کے کال سینٹرز اور سافٹ ویئر ہاؤسز میں اہم بلکہ فیصلہ ساز عہدوں تک پہنچ چکے ہیں۔ یہ محض ملازمتوں کا معاملہ نہیں بلکہ پاکستان کے نوجوانوں کی عالمی ڈیجیٹل معیشت میں شمولیت کی ایک اہم مثال ہے۔

امریکی اور یورپی بینکوں کے لیے کام کرنے والی کمپنیوں کے کاروباری معاملات عموماً تھرڈ پارٹی کنٹریکٹس، آؤٹ سورسنگ معاہدوں اور مخصوص ڈیٹا پروٹیکشن شرائط کے تحت چلتے ہیں۔ بعض صورتوں میں بینک براہ راست کال سینٹرز کے بجائے امریکی قانونی فرموں یا دیگر مجاز سروس فراہم کرنے والے اداروں کے ذریعے بیرون ملک کمپنیوں کو خدمات فراہم کرنے کے معاہدے دیتے ہیں۔

پاکستان میں قانونی طور پر کام کرنے والے سافٹ ویئر ہاؤسز اور کال سینٹرز کے لیے ایف بی آر اور ایس ای سی پی میں رجسٹریشن، پاکستان سافٹ ویئر ایکسپورٹ بورڈ سے متعلقہ منظوریوں اور پی ٹی اے کے ٹیلی کمیونیکیشن تقاضوں کی پابندی اہم ہے۔

وائس اوور انٹرنیٹ پروٹوکول (VoIP) کے ذریعے بین الاقوامی کلائنٹس سے رابطے کے لیے مخصوص نظام استعمال کیے جاتے ہیں۔ وائٹ لسٹڈ آئی پی، نیٹ ورک سکیورٹی، کال مانیٹرنگ اور ڈیٹا تک محدود رسائی جیسے اقدامات کاروباری شفافیت اور سکیورٹی کو یقینی بنانے میں اہم کردار ادا کرتے ہیں۔

اس کے برعکس غیر قانونی کال سینٹرز المعروف ’’ڈبہ‘‘ میں مبینہ طور پر ابتدائی رابطے کے لیے VoIP استعمال کیا جاتا ہے، لیکن کال قائم ہونے کے بعد صارف کو واٹس ایپ یا دیگر پلیٹ فارمز پر منتقل کرکے کریڈٹ کارڈ، بینک اکاؤنٹس اور دیگر حساس معلومات حاصل کرنے کی کوشش کی جاتی ہے۔

یہی وہ بنیادی فرق ہے جسے محض ایک ہی عمارت میں کال سینٹرز کی موجودگی یا کمپیوٹرز اور انٹرنیٹ کے استعمال کی بنیاد پر طے نہیں کیا جا سکتا۔

کراچی میں قانونی اور غیر قانونی کال سینٹرز کی بڑی تعداد موجود ہونے کے باوجود بنیادی سوال یہ ہے کہ کیا این سی سی آئی اے نے ان اداروں کی مکمل درجہ بندی، رجسٹریشن، کاروباری نوعیت اور غیر ملکی کلائنٹس کی تفصیلات پر مشتمل کوئی مستند ڈیٹا بیس تیار کیا ہے؟

کیا این سی سی آئی اے کے پاس یہ معلومات موجود ہیں کہ کون سا ادارہ کس امریکی یا یورپی بینک کے ساتھ کام کر رہا ہے، اس کے معاہدے کس نوعیت کے ہیں، کلائنٹس سے رابطے کے لیے کون سا اسکرپٹ استعمال ہوتا ہے، صارفین کا ڈیٹا کہاں محفوظ کیا جاتا ہے اور اس تک رسائی کن افراد کو حاصل ہے؟

کیا کارروائی سے پہلے متعلقہ کمپنی کے غیر ملکی کلائنٹ، آڈٹ ریکارڈ، ڈیٹا سکیورٹی پروٹوکول اور ریگولیٹری منظوریوں کی تصدیق کی جاتی ہے؟ یا پھر کسی شکایت یا ابتدائی اطلاع پر پورے ادارے کی کاروباری سرگرمیاں روک دی جاتی ہیں؟

اگر کوئی کمپنی واقعی غیر قانونی سرگرمیوں میں ملوث ہے تو اس کے خلاف سخت کارروائی ہونی چاہیے، لیکن اگر اسی ادارے میں سیکڑوں پاکستانی نوجوان قانونی بین الاقوامی کاروبار سے منسلک ہیں تو ان کے روزگار اور معاہدوں کے تحفظ کے لیے بھی کوئی طریقہ کار ہونا چاہیے۔

این سی سی آئی اے کی بعض سابقہ کارروائیوں کے حوالے سے یہ الزامات بھی سامنے آتے رہے ہیں کہ کال سینٹرز سے حاصل ہونے والا ڈیٹا مبینہ طور پر غیر قانونی کال سینٹرز تک پہنچایا گیا۔ اگر ایسے واقعات میں کسی افسر یا اہلکار کے خلاف شکایت یا تحقیقات موجود ہیں تو ان کے نتائج عوام کے سامنے لانا ضروری ہے۔

آخرکار سائبر کرائم کے خلاف کارروائی کرنے والے ادارے کی اپنی تحویل میں آنے والا ڈیٹا بھی اتنا ہی حساس ہوتا ہے جتنا کسی بینک یا عالمی کمپنی کا ڈیٹا۔ اس لیے ضبط شدہ ڈیجیٹل ریکارڈ، ہارڈ ڈرائیوز، سرورز اور صارفین کی معلومات کی حفاظت کے لیے سخت نگرانی اور جوابدہی کا نظام ہونا چاہیے۔

کراچی جیسے معاشی مرکز میں قانونی اور غیر قانونی کال سینٹرز کی موجودگی کو ایک ہی پیمانے پر پرکھنا نہ صرف انتظامی کمزوری بلکہ قومی معاشی مفادات کے لیے بھی نقصان دہ ثابت ہو سکتا ہے۔

اگر امریکی اور یورپی کمپنیوں کے ساتھ کام کرنے والے ادارے این سی سی آئی اے کی کارروائیوں کے باعث اپنے معاہدوں، ملازمین اور کاروباری مستقبل کے حوالے سے غیر یقینی صورتحال کا شکار ہو رہے ہیں تو اس کا اثر پاکستان کی آئی ٹی برآمدات، غیر ملکی سرمایہ کاری اور نوجوانوں کے روزگار پر پڑ سکتا ہے۔

یہاں ایک اہم سوال یہ بھی ہے کہ اگر امریکی بینکوں اور کمپنیوں کے ڈیٹا کی چوری یا فراڈ کے الزامات درست ہیں تو متعلقہ غیر ملکی اداروں کے ساتھ رابطہ کرکے حقائق کی تصدیق کیوں نہیں کی جاتی؟ اور اگر قانونی معاہدوں کے تحت کام کرنے والے اداروں کے خلاف کارروائی ہوئی ہے تو اس کے نتیجے میں ہونے والے کاروباری نقصان اور ملازمتوں کے خاتمے کی ذمہ داری کون قبول کرے گا؟

کیا این سی سی آئی اے نے کراچی سمیت ملک بھر میں قانونی سافٹ ویئر ہاؤسز اور کال سینٹرز کی جامع میپنگ کی ہے؟

کیا کارروائیوں سے قبل امریکی اور یورپی بینکوں کے ساتھ معاہدوں کی تصدیق کا کوئی نظام موجود ہے؟

کیا غیر تکنیکی افسران کو پیچیدہ بین الاقوامی بینکنگ، ڈیٹا سکیورٹی اور آئی ٹی آؤٹ سورسنگ کے معاملات کی جانچ کے اختیارات حاصل ہیں، یا اس عمل میں ماہر سائبر سکیورٹی اور آئی ٹی آڈیٹرز کو شامل کیا جاتا ہے؟

کیا قانونی کاروبار کرنے والے اداروں کے لیے کوئی واضح ضابطہ، شکایت کے ازالے کا نظام اور کارروائی سے پہلے تکنیکی جانچ کا طریقہ کار موجود ہے؟

اور سب سے اہم سوال: اگر غیر قانونی کال سینٹرز کے خلاف کارروائیوں کا مقصد شہریوں اور غیر ملکی صارفین کو مالیاتی فراڈ سے بچانا ہے تو پھر قانونی آئی ٹی انڈسٹری کے تحفظ اور غیر قانونی نیٹ ورکس کی مؤثر بیخ کنی کے لیے الگ الگ حکمت عملی کیوں نظر نہیں آ رہی؟

پاکستان کو سائبر کرائم سے محفوظ بنانا ناگزیر ہے، لیکن اس جنگ میں قانونی کاروبار، غیر ملکی سرمایہ کاری اور نوجوانوں کے روزگار کو قربان نہیں کیا جا سکتا۔

آخرکار سوال یہ نہیں کہ غیر قانونی کال سینٹرز کے خلاف کارروائی کیوں ہو رہی ہے، بلکہ سوال یہ ہے کہ کیا ان کارروائیوں میں اصل مجرموں اور قانونی آئی ٹی انڈسٹری کے درمیان فرق بھی کیا جا رہا ہے؟ اور اگر نہیں، تو اس کی ذمہ داری کس پر عائد ہوتی ہے؟

ا